Елімізде 1 мамыр – Қазақстан халқының бірлігі күні атап өтіледі. Мейірім мен ізгілікке толы бұл мереке қарсаңында біз қаламыздағы үлгілі, жарасымы келіскен жанұялардың бірі – Шигабутдинов әулетімен жүздесіп, тағылымды әңгіме өрбіттік.
Бұл жанұя таяуда ғана «Кітап оқитын әулет» байқауында жүлдегер атанған. Сол сәтте олардың бір-біріне деген шынайы қолдауы мен жанашырлығы ерекше сезілген еді. Үйдің отағасы Дамир Шигабутдинов - «Шұбаркөл Көмір» АҚ операциялық тиімділік және өндіріс жүйесінің басшысы, отанасы Динара Шигабутдинова – «Қарағанды облысы Саран қаласының арнаулы әлеуметтік қызметтер көрсету орталығы» коммуналдық мемлекеттік мекемесінде жұмыс істейді.
Дамир Ринатович, осыдан 15 жыл бұрын жұбайыңызбен бірге шаңырақ көтеріп, бүгінде үш ұл баланы тәрбиелеп отырсыздар. Осы уақыт аралығында қандай отбасылық дәстүрлер қалыптасты?
- Біз Саранда туып-өстік. Біздің отбасымыз тату-тәтті әрі қаламыздағы көптеген жанұялар секілді көпұлтты. Менің ұлтым – татар болса, әйелім – қазақ. Осы уақыт аралығында біздің өмірімізде ерекше құнды дәстүрлер қалыптасты. Ең бастысы - әр кеш сайын бірге отбасылық кешкі асты ішу. Қанша жерден күніміз ауыр өтсе де, біз әрдайым бір дастарқан басында жиналып, күніміздің қалай өткенімен бөлісеміз, балаларды тыңдауға тырысамыз. Бұл сәттер бізді одан сайын жақындастырып, нағыз бір команда екенімізді сезіндіреді. Сондай-ақ, біз Ұлы Жеңіс күнін зор құрметпен және ризашылықпен атап өтеміз. Әйелімнің атасы Садыков Тахауй – Ұлы Отан соғысына қатысқан. Біз оның есімін ардақтаймыз, әрқашан шеруді тамашалап, ұлдарымызға ардагерлеріміздің ерлігі мен бейбіт өмірдің бізге қандай қымбат бағамен келгенін айтып отырамыз. Әрине, Қазақстан халқының бірлігі күні біз үшін өте маңызды - бұл күні біз осындай достық, көпұлтты елде өмір сүргенімізге қаншалықты бақытты екенімізді ерекше сезінеміз. Сондай-ақ, біз әрқашан Кеншілер күнін тойлаймыз, өйткені әкем Ринат Шигабутдинов - кенші және көпжылдық адал еңбегі үшін 2-ші дәрежелі «Шахтер даңқы» төсбелгісімен марапатталған. Бұл мамандық біздің отбасымызда жоғары бағаланады. Әрине, отбасының әр мүшесінің туған күні — әрдайым торт, сыйлықтар және жылы лебіздерге толы шағын мереке. Ал Жаңа жыл біз үшін — нағыз сиқырлы отбасылық мереке! Біз бірге шыршаны безендіріп, сүйікті тағамдарымызды дайындаймыз. Балалар бұл кешті ерекше күтеді, өйткені олар үшін бұл — ертегіге толы сәт болса, бүкіл отбасымыз үшін қуаныш пен үмітке бөленетін уақыт. Осы дәстүрлердің барлығы бізге бағалы. Сол себепті үйімізде әрдайым жылулық пен өзара түсіністік салтанат құрады.
Керемет! Ал сіздерде отбасының барлық мүшелері ұстанатын ортақ қағида бар ма?
- Біздің отбасының басты ережесі: «Жақсы сөз айт та, жақсылық жаса!». Біз үйімізде алғыс, мақтау және қолдау сөздерінің мүмкіндігінше жиі айтуға тырысамыз. Сын мен пікірлерді де білдіреміз, бірақ әрқашан сабырлы және салмақты түрде жеткіземіз. Мысалы, кешкі асқа «рақмет» айту, кішкентай інісіне сөмкесін жинауға көмектесу, қиын күннен кейін анасын құшақтау және т.б. Балалар бұл атмосфераға тез бейімделіп, өздері де жылы сөздерді жиі айта бастайды. Біз отбасында мейірімділік пен ризашылық қалыптасқан кезде, қақтығыстар әлдеқайда азайып, қуаныш артатынын байқадық.
«Әке – асқар тау, ана – бауырындағы бұлақ, бала – жағасындағы құрақ» демекші, балаларыңыздың қандай жетістіктері сіздерді қатты қуантады?
- Бізге ең үлкен қуаныш сыйлайтын нәрсе – үш ұлымыздың оқудағы және спорттағы, сондай-ақ күнделікті мінез-құлқы мен қамқорлықтағы жетістіктері. Ұлдарымыз мектептен жақсы бағалар алғанда немесе қиын пәннен айтарлықтай ілгерілегенде, біз олармен шынымен мақтанамыз. Біз үшін бұл жай ғана кестедегі сандар емес, олардың еңбекқорлығының, жауапкершілігінің және табандылығының дәлелі. Біз олардың спорттық жетістіктеріне ерекше қуаныштымыз. Ұлдар жарыстарда жүлделі орындарға ие болғанда, турнирлерде жеңіске жеткенде немесе жай ғана жақсы нәтижелерге қол жеткізгенде, бұл нағыз мақтаныш көзі және ата-ана ретінде біз үшін ең үлкен марапат. Біз олардың өз шектеулерін қалай жеңуді, команда болып жұмыс істеуді және қиындықтарға тап болғанда бас тартпауды қалай үйренетінін көреміз. Бірақ бізді одан да қатты тебірентетін сәттер — ұлдарымыздың қамқорлық көрсетіп, үй шаруасына көмектесуі. Үлкені кішілеріне үй тапсырмасын орындауға көмектескенде, кішісі кешкі астан кейін ыдыс жууға ерікті болғанда немесе үшеуі үйді жинау үшін бірге жұмыс істегенде – осындай жауапкершілік пен бауырмалдық көріністері біз үшін ерекше қымбат. Біз үшін балалардың тек жақсы оқып, спортпен шұғылдануы ғана емес, сонымен қатар мейірімді, жанашыр болып өсіп, бір-бірін қолдауға дайын болуы да өте маңызды. Әрбір жетістік, үлкен немесе кіші болсын, бізді ұлдарымызды жақсы тәрбиелеп жатқанымызға үлкен қуаныш пен сенімділік сыйлайды. Біз олармен мақтанамыз және бұл туралы мүмкіндігінше жиі айтуға тырысамыз.
Ұрпақтан-ұрпаққа беріліп келе жатқан қандай да бір салт-дәстүрлеріңіз бар ма?
- Иә, және бұл біз үшін өте маңызды. Біз ұлдарымыздың тек біліп қана қоймай, алдыңғы буындармен шынайы байланыс сезінуін қалаймыз. Сондықтан біз әке-шешеміз бен ата-әжелеріміздің көптеген әдет-ғұрыптарын сақтаймыз. Ең алдымен, бұл үлкендерге құрмет көрсету және оларға шынайы қамқорлық жасау. Біз сондай-ақ қонақжайлылық дәстүрін құрметтейміз: қонақтарды әрқашан үйімізде қарсы аламыз, ал дастарқанымыз сүйіспеншілікпен жайылады. Біз әсіресе аспаздық дәстүрлерді ұрпақтан-ұрпаққа жеткізуді ұнатамыз. Біз отбасымызбен бірге ет асамыз, бауырсақ және басқа да ұлттық тағамдар дайындаймыз. Біз осындай қарапайым нәрселер арқылы балалар өз мәдениетін жақсы түсінеді және отбасылық тамырларын бағалайды деп сенеміз.
Қазақстан халқының бірлігі күнін отбасыңызбен қалай атап өтесіздер?
- Бұл күн біз үшін өте маңызды. Балаларымызға Қазақстанда 130-дан астам ұлт өкілдері тұратынын, әрі бәріміз бір үлкен отбасы екенімізді айтып отырамыз. Бұл күні әдетте біз мерекелік дастарқан басына жиналып, ұлттар арасындағы достық туралы әңгімелесіп, бейбіт әрі көпұлтты елде өмір сүріп жатқанымызды мақтаныш етеміз. Осы мереке қарсаңында, барлық отбасыларға зор денсаулық, мол бақыт, сүйіспеншілік пен ынтымақ тілейміз. Қазақстанның әрбір шаңырағында бейбітшілік, сыйластық пен қуаныш орнасын. Бірлігімізді бірге сақтайық! Мерекеле құтты болсын, қадірлі жерлестер!
Алтын уақытыңызды бөліп, сұрақтарымызға жауап беріп сұхбат бергеніңізге көп рақмет. Отбасыңызға бақ-береке, ырыс-ынтымақ тілейміз. Ұлдарыңыз үлкен азамат болып өссін, елеулі жетістіктерге жете беріңіздер.
Сұхбаттасқан:
Дина ӘБДІҒАЛИЕВА
