Қазіргі қоғамда дамудың басты кедергілерінің бірі — сыбайлас жемқорлық. Ол мемлекеттердің әлеуметтік, экономикалық және саяси дамуына үлкен зиян келтіретін теріс құбылыс. Сыбайлас жемқорлық халықтың билікке деген сенімін азайтып, әділеттілік пен заң үстемдігіне күмән тудырады. Сондықтан «Сыбайлас жемқорлыққа жол жоқ!» ұраны — әрбір азаматтың өмірлік ұстанымына айналуы тиіс.

Сыбайлас жемқорлық — бұл лауазымды тұлғалардың жеке пайда табу мақсатында өз қызмет бабын теріс пайдалануы. Мұндай әрекеттер білім беру, денсаулық сақтау, құқық қорғау салаларында жиі кездесіп жатады. Мысалы, пара алу, қызметке орналастыру үшін ақша талап ету немесе мемлекеттік сатып алуларда артықшылық жасау сияқты жағдайлар халықтың наразылығын тудырып, әділетсіздік сезімін қалыптастырады.

Қазақстанда бұл мәселеге қарсы жүйелі жұмыстар жүргізілуде. Ел Президенті Қасым-Жомарт Тоқаевтың бастамасымен сыбайлас жемқорлыққа қарсы күрес — мемлекеттік саясаттың басым бағыттарының бірі ретінде айқындалды. «Сыбайлас жемқорлыққа қарсы іс-қимыл туралы» заң аясында түрлі реформалар жүзеге асуда, ашықтық пен есептілік қағидалары енгізіліп жатыр. Электронды үкімет жүйесі мен цифрландыру арқылы адам факторы азайтылып, жемқорлық қаупі төмендетілуде.

Алайда заңнамалық шаралармен қатар, азаматтық қоғамның белсенділігі де аса маңызды. Сыбайлас жемқорлықпен күрес — тек құқық қорғау органдарының ғана емес, әрбір азаматтың борышы. Әр адам пара бермеуге, заңды бұзбауға, әділеттілік принциптерін ұстануға міндетті. Жас ұрпаққа адалдық пен тазалықты үйрету, мектептен бастап жемқорлыққа қарсы мәдениетті қалыптастыру — жарқын болашақтың кепілі.

Сыбайлас жемқорлықты жеңу — оңай іс емес. Ол үшін ұжымдық жауапкершілік пен қоғамның сана-сезімі жоғары болуы қажет. Егер әрқайсымыз «адал боламын» деп шешсек, қоғамдағы әділетсіздік азайып, мемлекетіміздің дамуы тұрақты болмақ.

«Сыбайлас жемқорлыққа жол жоқ» деген сөз — жай ұран емес, ел болашағы үшін маңызды ұстаным. Әділетті қоғам құру жолында бізге бірлік, ашықтық және адалдық қажет. Жемқорлықпен күресу — бүгінгі емес, болашақ ұрпақтың бақыты үшін жасалатын қадам.

Р. Жиенбаева,

«ҚР ҚМ ҚК Қарағанды облысы бойынша Қазынашылық департаментінің

Саран қалалық қазынашылық басқармасы» РММ басшысы